SINTERKLOAS IN DE POLLETIEK

. o De Sinterklaostied is weer voorbie. De rommel is overgebleve, pakpapier in de lege dozen van de kadootjes. M'n gloave d'r niet meer in, in Sinterkloas dan, mar m'n doeë d'r aoUemaele an mee. Af f ijn, de kinders binne weer blieë, in wat is t'er noe leutiger dan 'n kind blieë te maeken! Kadootjes geve m'n niet alleen an de kinders, mar dat doeë oak de gróte maensen onder mekaore. De man an de vrouwe, de kinders an d'r ouwers in soms oak wel om vrienden un plezier te doeën.

Noe worre d'r oak wel 's kadootjes gegeve om mekaore te treiteren. Wat dienk je d'r van, as je un butterletter kriegt in daer zit un ende touwe in? (soms oak nog wel wat oares)! Van bute kan je d'r niks van zieë, hie zit in un mooie doze, hie is lekker bruun gebakke, mar o wee as je d'r in gaet snieë! Dan zaeg je op un kaebeltouwe!

„Van wie zou dat noe weze?" hoor je dan uutroepe. „Wie heit 'n dat noe gelapt?" Dat zal wel van d'n dieën of d'n dieën weze, want die heit 't niet op ons". In plekke datte ze d'r om lache in 't as un oarigheidje opvatte, maeke ze d'r eige d'r boos om. Soms vertelle ze 't oak nog an un oare. Dat is erreg lomp. Want die 't gedaen heit, heit t'er de grooste leut om.

't Gebeurt oak wel datter un grote doze bezurgd wordt netjes verpakt, mar mit inkel papier. In mar zoeke in krauwe, ofter toch nog wat in zit. Jae, un papiertje mit un versje d'r op. De vinder of vindster kleurt 'r van bie 't lezen, omdat ze over un bepaeld punt je lekker de waerheid zegge. Weet je wat je doeë mot as je zoiets overkomt? Net as mit anonieme (ongetekende) brieven, direkt in de pruUemand gooie. In d'r vooral niet over praete.

De gróte heren in de poUetiek geve mekaore oak wel 's un kadoo. Ik la in de krante dat oud-minister Vondelieng an de K.V.P.-voorzitter drs. W. K. N. Schmelzer un geschenk in de vurm van un weerhaen heit gegeve. Je mot het mar vatte. D'r zat un gedichtje bie van un paer regels: „Mijn politieke haan, is in beginsel polygaam"

Voor die het soms niet wete betekent polygamie: veelvoudige echt, veelmannerij, veelwijverij. In dit geval zal het wel „veelmannerij" weze. Je kan dan miteen begriepe, wat Vondelieng d'r mee bedoelt.

Drs. Schmelzer liet z'n eige oak niet onbetuugd, hie gaf un kadootje terug, 't Was un netje van gouddraed, vol mit sukelaode guldens in rieksdaelders. D'r was un versje bie, waer onder meer in stond, dat de guldens wel hard in waerdevast liekene, mar zo gauw as je ze beetpakt, smelte ze in je viengers! Noe dat is un waerheid as un koeie! In tot slot stond d'r op: „De verpakking is doorzichtig in van lichtgewicht, Mar as die Rijksbegroting, zo solide waeterdicht". Zo wordt Sinterklaos in de polletiek betrokke, un gelegenheid die de bewindvoerders gebruke, om mekaore in de haeren te zitten, 't Is meestal meer humor dan ernst, mar ondertussen zegge ze 't, in 't publiek kan d'r oak van geniete.

In de wienkels is weer goed verkocht, al hèwwe 'k m'n laete vertelle, dat het over 't algemeen genome minder was dan verléje jaer. De post heit daertig percent minder Sinterklaos-pakketten te verwerken gekrege, de maensen worre zuneger. Voorheen moste ze bie de post hulpkrachten an trekke om d boel te bezurgen in dat was noe niet nodig. De postverzending is oak veul te dier, dat speult oak un woordje mee. In 't nieuwe jaer gaen de tarieven weer naer bove, voor de brieven, drukwerk in oak om de krante te verzenden. Dat zit m'n niet lekker, daer zou 'k veul over kunne schrieve. Mar dat is weer un hoofdstuk apart in voor van de weke is 't weer genog. Schrammetje.

Deze tekst is geautomatiseerd gemaakt en kan nog fouten bevatten. Digibron werkt voortdurend aan correctie. Klik voor het origineel door naar de pdf. Voor opmerkingen, vragen, informatie: contact.

Op Digibron -en alle daarin opgenomen content- is het databankrecht van toepassing. Gebruiksvoorwaarden. Data protection law applies to Digibron and the content of this database. Terms of use.

Printen